 |
| Photo by Jamie Street on Unsplash |
Haba jubab ia ka jingkylli jong ki nongbud jong u shaphang ka dak ba pyni shaphang ka jingwan phai jong u bad ka jingwai noh ka pyrthei, U Jisu u sdang da kaba ong ha ki ba kim dei ban shah shukor. Pule Mathaios 24:3-5.
Ha ka kyrteng jong U.
Ha Mathaios 24:5, U Jisu hi u ong ba ki ba bun kin wan ha ka kyrteng jong u ban ialam bakla ia kiba bun. Ka suk eh ban wan ne leit ha ka kyrteng jong U Jisu. Ka long kaba suk bha ban ong ba ngi dei ki Khristan ne ki nongbud jong U Jisu. Ka suk palat ban pyndonkam ia ki kyntein ban pynithuh ialade ba ngi dei ki ei ki ei. U Jisu u kren shaphang kito kiba pyndonkam ia ka kyrteng jong u ban shukor ia kiwei.
Lada kiba iohsngew kim kylli jingkylli, lada kiba iohsngew ki shu sngap khlem wad ia ka nongrim, lada ki shu pdiang khlem kynmaw ia ki kyntien jong U Jisu - te kan jia ba ki nongshukor kin shukor da kaba suk.
Don bun jait ki nongsukor kiba wan ha ka kyrteng jong U Jisu. Ki nongsukor ki hikai ia ki jingshisha lem ba ka jingshukor. Ki pyndonkam ia ka kyrteng u Jisu bad ha ka juh ka por ki kyntait ia ka jingshisha. Namar kata ka eh bha ban ithuh ia ki ba ki dei ki nongshukor.
Ki da ong, Ma nga uba U Khrist.
Ngi iohi ha kane ka pyrthei ba ju don kito kiba ong ba ma ki ki dei U Khrist, wat mynta ruh! Bad namar kata la shah ialam bakla ia kiba bun lyngba jong ki. Ka long kaba suk ban ithuh ia kum kine.
Ka kyntien Khrist ka mut ba la pynsleh. Haba pynkylla lut ia ki kyntien, 'Ma nga uba U Khrist' ngi shem ba ka long kumne, 'Ma nga uba la (shah) pynsleh'. Ka jingmut ka long, 'Ma nga uba don U Mynsiem Bakhuid bad uba shah pynsleh da U Mynsiem Bakhuid.'
Ki don kiwei pat kiba ong ba ki long kiba la shah pynsleh da U Blei bad namar kata ki don ha kata ka kyrdang ban shukor ia kiwei. U Jisu u kren shaphang kito iba pyndonkam wat ia ka kyntien 'Khrist' lane 'ba la pynsleh' ban shukor ia kiba bun. Ka long kaba kham eh ban ithuh ia kum kine.
Kin shukor ia shibun.
Kine kiba pyndonkam bakla ia ka kyrteng jong u Trai Jisu bad kiba kam, da kaba shu lamler, ba ki dei kiba la shah pynsleh da U Trai - kin shukor ia kiba bun. Ong U Jisu, 'Kin shukor ia shibun.'
Ngi dei ban kynmaw ba ha kane ka bynta, U Trai Jisu u khlem kren shaphang kito kiba wan ha ka kyrteng jong u bad kiba hikai tang ia ki jingshisha jong u. U Jisu um shym la kren shaphang kito kiba ma u hi u la pynkyrpang bad pynsleh ban long ki nongpyni ia ka lynti jong u. Kine kin ym shukor ia ngi.
La Shukor Ne Em Ia Ngi?
Lyngba kane ka jingthoh barit nga kwah ban ple ia kane ka jingkylli, 'La shukor ne em ia ngi?' - namar ngi dei kita kiba bun. Ngi bud ia U Jisu ne ngi bud ia u briew? Ngi bud ia ki jinghikai U Jisu ne ngi bud ia ki wei pat ki jinghikai? Ngi pule Baibl ne ngi pynleit jingmut ha kiwei pat ki ktien? Ngi kyllakaba mut ne ngi wad tang ki jingsngewbha? Ka Gospel ne ka khubor tad? Ka jingaiei jong U Blei ne ki jingmut briew? Ka jingbishar U Blei ne ki jingpynskan ia ki nia jong ngi?
To ngin shahshkor ia ki kyntien jong u Jisu, 'To sumar ba uno uno ruh un ym shukor ia phi.'
Comments