 |
| Photo by Jon Tyson on Unsplash |
Ha Markos lynnong ba 10 dkhot ba 17-22 u samla ba riewspah u kylli kawei ka jingkylli ban ïoh jubab na U Jisu. 'Kaei kaba nga dei ban leh ban ïoh ïa ka jingim bymjukut?' (dk 17 BSI - Khasi - CL) Hynrei, haba u la ïoh ïa ka jubab u samla u la sngewsih bad kyntait ïa ka.
Ka long kaba bha ban kylli jingkylli. Ngi dei ban nang ban kylli ki jingkylli kiba bha bad kiba donkam. Ngim dei ban tieng ban buh ïa kine ki jingkylli ha khmat U Blei. Ka pyni ba ngi long la kloi ban ïoh jingtip bad ban san ruh. Ka mut ba ngi khlem sha kumjuh. Bad ngi dei ban kloi pat ban pynbud da ka jingkohnguh kieñ haba ngi la ïoh ïa ka jubab na U. Ym kumba long une u samla.
Kumjuh ngim dei ban tieng ban buh ïa ki jingkylli ba bha bad ba donkam ha khmat ki briew ruh. Khamtam ha khmat ki nongialam ha ka niam, ka politics bad ka imlang sahlang. Kane ka pyni ba ngi long kiba pyrkhat kumno ban pynbha bad pynjanai ïa kiei kiei baroh. Kine ki jait jingkylli ki ïaleh pyrshah ïa ka jingbamsap, jingarsap, jingjaituh, jingbymshai, bad kiwei kiwei ki pop bad jingduna ba don ha ka imlang ka sahlang jong ngi. Bad ha ka juh ka por ngi dei ruh ban kloi pat ban pynbud da ka jingkohnguh ïa ka Gospel ha kaba ban ïa map markylliang, ban pynbhalang, ban don jingsngewthuh, ban pynpaw ïa ka jingaiei, bad ban kylla kaba mut ruh haba donkam.
Kaba sngewsih shaphang u samla bariewspah ha Markos 10:17-21 ka long ba u kylli ka jingkylli ba donkam bha hynrei um shim la pynbud da ka jingaiti lane ka jingkohnguh jong u. U shaniah ha ki jubab ba u la don lypa - khamtam ha ka spah ba u don.
Ka jubab jong U Jisu ia une u samla ka long ar bynta: kaba nyngkong dei ka Aiñ U Blei bad kaba ar pat kadei ka Gospel jong U. Ka Aiñ U Blei ka pynpaw ïa ki pop jong ngi. Bad ka Gospel jong U Jisu pat ka pyllait ïa ngi na ki pop jong ngi.
U samla u la bat bha ïa ka hukum jong U Blei kaba ïadei bad ki parabriew. U la leh kumne da ka bor bad da ka spah jong u hi. Namar kata ki briew kiba kynduh ïa u, lehse, kin ong ba u dei u briew babha. U Jisu lei lei u la peit ïa u bad u la ieit ïa u. Hynrei, U Jisu u la leh khnang ban ïathuh ha une tang ki bynta jong ka Ka Shiphew Hukum kiba ïadei bad ki para briew. U leh kumne namar u la tip lypa ba une u samla ha ka jingïadei jong u bad U Blei pat u long u nongpop. U samla u la lyngngoh tharai. Bad ha ka jingmut jong u u la kynmaw ïa baroh ki bynta na Ka Shiphew Hukum. Hynrei kane ka jingkynmaw kam shim la pynsngewthuh ïa u. Bad um treh ban pdiang ïa kaba U Jisu u la pynpaw ha u, ba u blei jong u dei ka spah jong u hi wat la u long u briew babha.
Ka Gospel jong U Jisu kam dei kaei kaei ban pynbha jinglong ia ki bynriew hynrei kadei ka jingkhot ban kylla kaba mut na ki pop jong ngi. Ki jinglong kiba bha ki dei ki soh kiba wan hadien ka jingkylla kaba mut - ki dei da ka bor bad jingaiei jong U Blei. Ka bha ban long ki briew kiba bha hynrei kane kam mut ba ngi la ïoh ïa ka jingim ba bymkukut.
Ki jingkylli ki bym pynpoi ïa ngi sha ka Gospel, ne sha ka jingkylla kaba mut (kaba kat kum ka Gospel), ne sha ki soh jong ka Gospel ki long lehnohei baroh. La lehnohei ka jingim babha jong uto u samla namar u blei jong u dei ka spah ba u don. Yn lehnohei ki jingkylli bad ki jingim jong ngi ruh lada ngim sngewthuh ba ngi donkam ïa ka Gospel. La lehnohei ki jingkylli bad ki jingim jong ngi ruh lada ngim im kat kum ka Gospel ha ka imlang ka sahlang.
To U Blei un ïarap ïa ngi ba ngin kylli ki jingkylli kiba bha bad kiba donkam kiba pynphai ïa ngi sha ka jingim ba bymjukut.
Comments