 |
| Ba Kongsan Tam Na Ki Hukum Photo by Aaron Burden on Unsplash |
Ha Mathaios 22:34-39 (Markos 12:28-31) ngi pule shaphang ki ar tylli ki hukum ba kongsan ba U Jisu hi u la pynshai. Bad ha kine baroh ar, ong U Jisu hi ha Mathaios 22:40, la sdien baroh Ka Hukum bad Ki Nongiathuhlypa. Ka jingkylli ka mih ha ki jingmut jong ngi lehse, kaba ngi lah ban buh kumne: kaei ka jingiadei jong kine baroh ar ki hukum bad ki kyntien jong U Jisu hi kaba ngi lah ban khot ha ka ktien Khasi, Ka Jingpynkup Bor Trei Kam Kaba Khraw (lane ha ktien English, The Great Commission) ba ngi shem ha Mathaios 28:19-20 bad Markos 16:15?
Sa shi sien ka jingkylli: kaei ka jingiadei hapdeng Ki Hukum Ba Kongsan Tam (The Greatest Commandments) bad Ka Jingpynkup Bor Trei Kam Kaba Khraw (The Great Commission)? Lane, kaei ka jingiadei hapdeng ki kyntien ha Mathaios 22:34-39 (Markos 12:28-31) bad ki kyntien ha Mathaios 28:19-20 (Markos 16:15)?
Kumba ngi la pule; ka hukum ba kongsan ba nyngkong ka kren shaphang ka jingieit ia U Blei bad ka hukum ba ar, kaba long kum kaba nyngkong, ka kren shaphang ka jingieit ia ki paramarjan. Bad ngi pule ruh ba U Jisu, hadien ba u la mihpat na kaba iap, u la ong ha ki synran ba kin leit pynlong synran ia ki briew baroh (lane ialap ia ka Khubor Babha jong U ha ka pyrthei baroh). Ia ka jingiadei kine baroh ar ngin iohi kumne harum:
1. Ki briew baroh kim ieit ia U Blei namar bun napdeng jong ki kim tip ba U Blei u ieit ia ki. Don lei lei ki mutdur ba U isih ia ki. Kim lah ong, 'Ngi ieit ia u, namar u la ieit shuwa ia ngi' (Peit 1 Ioannis 4:19). Donkam ban leit iathuh ha ki shaphang ka jingmapei ia ki pop, ka jingaiei, ka jingisynei bad ka jingieit jong U Blei shaphang jong ki. Ynda ki la tip ba U Blei u ieit shuwa ia ki hangta kieñ kin sa sngewthuh ban ieit ia U da la ka dohnud, ka mynsiem, ka jingmut bad ka bor jong ki baroh.
Namar kata ngi donkam ban ialap bad pynlong synran ia ki briew ba kin ioh lait na ka pop bad ba kin ioh mane bad ieit ia U Blei khlem jingartatien ne jingsheptieng. Uwei u pastor, u pastor John Piper, u ong, 'Ki kam mission kim dei ka thong ba kongsan eh jong ka Balang. Kadei ka jingmane kieñ. Ki kam mission ki don dei namar ba ka jingmane kam pat don.' ('Missions is not the ultimate goal of the church. Worship is. Missions exists because worship doesn't.')
2. Haba ngi peit ia ka pyrthei ngi iohi ba don hi ka jingieit hynrei ka pher na ka jingieit ba U Blei u hikai ia ngi ban ieit. Ka jingieit jong ka pyrthei ka dei ka jingieit tang ialade - ban myntoi ialade, ban pynksan ialade ban iada ialade. Kum kane ka jingieit ka wanrah shibun ki jingeh ha ka jingiadei (relationship) jong ngi bad ki para briew.
Ki briew jong kane ka pyrthei kim tip ba don ka rukom ba kham bha: kata kadei ka rukom jong ki nongbud U Jisu - ka rukom ba U Blei u hikai ban ieit kumba ialade. Kum kane ka jingieit ka wanrah jingkyrkhu ha ki jingiadei (relationships) jong ngi. Ban tip shaphang kane ka jingieit ba ki Khristan ki dei ban don pule 1 Korinth 12:31-13:13.
U Blei um kwah ba ngin iasuk tang bad U hynrei U kwah ba ngin iasuk parabriew ruh. Mano ban leit hikai ia kane? Mano ban leit pyni ia kane? Hato ym dei ma ngi kiba la bud lypa ia U Jisu Khrist.
Ka Jingpyntreikam lane ka Jingpyndonkam ia kane ka jinghikai. Ka jingpyntreikam (application) ia ki jinghikai na ka Ktien U Blei ka dei kaba kongsan bha. Khlem pyntreikam ia ki ha ka jingim jong ngi ka pyni ia ka jingsarong, jingbymsalia, jingbymkohnguh jong ngi bad ka ialam kham jylliew shuh shuh ia ngi ha ka pop. Hynrei haba ngi pyntreikam ia ki jinghikai ngin ioh shibun ki jingmyntoi ha ka jingim jong ngi.
Comments