 |
| Ba KongSan Tam Na ki Hukum Photo by Aaron Burden on Unsplash |
1. Ka hukum kaba nyngkong bad kaba kraw lane ka hukum ba kongsan tam, kat kum ki kyntien jong U Jisu hi, dei ban ieit ia U Trai da la ka dohnud, ka mynsiem, ka jingmut bad ka bor baroh. Pule na Mathaios 22:34-38 bad na Markos 12:28-30 (Peit na Deuteronomi 6:5; 11:1, 13; 19:9; 30:6).
2. Kaba ar kaba long kumjuh, kat kum ka jingkren U Jisu, dei ban ieit ia la ki paramarjan kumba ieit ialade. Pule na Mathaios 22:39 bad na Markos 12:31 (Peit na Lebitikos 19:18; Rom 13:9).
Ha kine baroh ar, ong U Jisu, la sdien baroh Ka Hukum bad Ki Nongiathuhlypa [ka Testament/Jutang Barim baroh (all the Old Testament)]. Pule na Mathaios 22:40.
Ka jingkylli ba nyngkong: kine ki ar tylli ki hukum ki don jingiadei aiu bad ka Jutang Bathymmai?
1. Kaba nyngkong ka iadei bad ka jingkylla kaba mut na ki pop jong ngi. (Lehse ngi donkam ban kylla kaba mut biang). Ka kren shaphang ka jingngeit ha U Jisu Khrist bad ka jingpdiang ia U ha ka jingim jong ngi. Ka kren shaphang ka jingiadei (relationship) jong ngi bad U ba man ka sngi. Ka thiang ne em ka jingiadei jong ngi bad U Blei katba ki sngi ki dang iaid? Pule na Loukas 4:8; 1 Korinth 16:22*; Ioannis 3:16; Ephesos 1:15a; Kolosai 1:4a; Markos 1:15; Ioannis 1:12; Ki Kam Ki Apostol 10:43 bad kumta ter ter.
2. Kaba ar ka kren shaphang ka jingiadei (relationship) jong ngi bad ki parabriew (ki para-Khristan ruh) hadien ba ngi la kylla kaba mut. Kumno ngi im hadien ba ngi la long Khristan? Ngi long jingkyrkhu ne ngi long maw jynthut? Lada ngi kynmaw tang ban mane Blei hynrei ngi klet ban ieit ia la ki paramarjan te ngin long kiba la bakla shibun eh. Pule na Ephesos 1:15b; Kolosai 1:4b; 1 Petros 2:12; Rom 13:8; 1 Ioannis 3:18, 4:20 bad kumta ter ter.
Haba ngi bud ia U Jisu, haba ngi iaineh kumta bad haba ngi pyni shisha ia ka jingieit ha ki paramarjan ngi iai pyndep ia ka Jutang Bathymmai.
Ka jingkylli ba ar: kaei ka jingiadei jong kine baroh ar bad ki kyntien jong U Jisu hi ha Mathaios 28:19-20 (Markos 16:15); kaba ngi lah ban khot ha ka ktien Khasi, Ka Jingpynkup Bor Trei Kam Kaba Khraw (lane ha ktien English, The Great Commission)? Yn sa bteng...
* Ka kyntien 'anathema!' ka mut 'u balatim' (accursed) bad ka kyntien 'Maranatha!' ka mut 'Ko Trai, to wan!' ha 1 Korinth 16:22.
Comments